|
Sa paggawa ng mga salsa sa mga ulam na may matabang na timpla, tulad ng pinasingawan na isda o karne, at sa mga gulay na binanlian lamang o pinasingawan, ay makakasarap ang salsa na niluluto ng bukod. Ang naturang salsa ay ipapahid o ibubuhos sa ulam kapag ihahain na. O kaya ilalagay sa isang platito o puswelo at itatabi sa bandehado ng ulam na babagayan. Sa mga salsa, ang karaniwan na ipinanlalapot ay arina (cornstarch) marami ang nahihirapan di umano sa pagsasama ng arina, sapagkat hindi daw nagpapantay ang pagkakalapot ng salsa. Upang maiwasan ang di pantay na pagkakalapot ng salsa, kailangan ay alisin muna sa pagkakasalang sa apoy ang kaserola o kawali na pinaglulutuan bago isama ang arina. At di lulubayan ng paghalo hanggang di nakikitang pantay na ang pagkakalapot. gayun din ang gawin kapag amg ilalahok ay gatas o tubig, habang panay ang paghalo. Makabubuti rin kung ang gagamitin na panghalo sa salsa ay sandok na kahoy.
|
